الله لا يعيده فيلم كونان الي رحنا له، كان مكيف السينما يجلد جلد، وانا قاعد اطالع الطعة الي بآخر الفيلم وانا اتنافض!
قالي صاحبي: شكلك زكمت!
قلت: لقطتها من واحد معنا بالدوام، وكمل علي الفيلم والمكيف، تكفى وقف عند الصيدلية!
ورجعت نهاية اليوم قطرت بقطرة الانف الي احس انه بينفجر، ونمت!
صحيت على موعد دورة عن بعد، محاظرنا سعادتني اني ادخل في حالة اسميها: jingle bells!
هذه الحالة هي لما تكون انت حاضر حدث، ولكن مخك في ملكوت اخر، بسبب حبة المضاد.
اذكر الدورة انتهت ٤ العصر والدكتور يقول:
In a one horse open sleigh
عرفت اني خارج التغطية
نزلت لمحل الخضار قلت له: عطني كيلو ليمون ابو زهيرة!
وصرت اعصر من هالليمون بالشاهي الي محليه بالعسل، لادخل في مرحلة ثانية!
صار الليمون يتكاثر فجأة بالبيت!
حتى ان لونه الاخضر يحاصرني، واذا بغيت اغير، اخذ الليمون الاصفر، وصرت اذا شفت الشمس استشعر حموضة في حلقي!
هنا، بدأت حرارتي ترتفع! فقررت استخدم اقدم خدعة بالكتاب مثل ما يقول الامريكان: وضعية سيد قشطة!
تجيب قدر تحط فيه فكس وتصب عليه ماء حار، وتتغطى باقرب شرشف صلاة وخذلك استنشاق يذكرك باول مرة سويت الحركة ذي، ومع كل سحبة نفس تكح وتضحك ويضحكون الي حولك من اهل بيتك، ما توقف لين تحس ان خشمك فعلا انفجر لكن مخك هو الي بدأ يذوب!
لكن الحرارة ما تنزل ولا تقدر تنام، فتقرر انك تشطب يومك وتستأذن من دوامك بكرة، لانك بتدخل في وضعية الشرنقة!
هذي انت تدهن كلك فقكس كنك دجاج شواية، وتلبس شراب ما اطول منه، وتغطي راسك ووحلقك بشاش كنك في مهمة توم كروز المستحيلة، وتغطس في فراشك لحالك تحت اللحاف، وما تطلع لين يصير مسبح، والغرفة تبث نسائمها العليلة للخارج، تدري ان الغرفة صارت غير قابلة للاستخدام وملاسبك قابلة لتحلل!
تصير شوي مصحصح بس ايضا الليمون رفيقك مع ملعقة عسل وتتغرغر وتشرب ليمون
ولو تحسب كمية المناديل الي انت خلصتها، تعرف كم حققت ارباح لشركة المناديل، لكن بالاخير، هذه المكافحة التقليدية هي الحل الامثل، فهي احيانا تساعد على انك تتذكر شغلات ان تنسى بعضهن
ايه صح! الحين موعد جرعة الليمون التالية!
ليست هناك تعليقات:
إرسال تعليق